AUSTRI– Lara Kolturi përgatitet për sfidën e radhës në Kupën e Botës në ski alpine, teksa këtë fundjavë garat do të transferohen në Semering të Austrisë.
Skiatorja italiane që përfaqëson Shqipërinë do të konkurrojë si në sllallomin gjigant, ashtu edhe në sllallomin special, dy disiplina që pritet të sjellin emocione për sportdashësit shqiptarë. Të shtunën do të jetë radha e rrëshqitjes së parë, e cila starton në orën 10:00, ndërsa zbritja e dytë do të nisë në orën 13:00. Të dielën do të vijohet me sllallomin special, i cili nis me rrëshqitjen e parë në orën 14:15 dhe kompletohet me zbritjen e dytë që fillon në orën 17:45.
Në renditjen e përgjithshme të Kupës së Botës, Lara Kolturi aktualisht pozicionohet në vendin e tetë, me 302 pikë të grumbulluara gjithsej deri më tani. 19-vjeçarja kuqezi synon një paraqitje më të mirë në Semering, pas eksperiencës zhgënjyese që pati në sllallomin gjigant në Kurshevel, ku skualifikua gjatë zbritjes së parë. Kujtojmë që deri tani në Kupën e Botës, Lara ka arritur dy vende të dyta në Levi të Finlandës dhe Gurgl të Austrisë, si edhe një vend të tretë në Malet Kuper në Shtetet e Bashkuara të Amerikës.
Rezultate fantastike dhe historike për Shqipërinë në një sport me traditë modeste për vendin tonë. Ndërkohë, lidere e këtij sezoni në Kupën e Botës mbetet Mikaela Shifrin. Legjenda amerikane mban vendin e parë me 558 pikë. Në vend të dytë pozicionohet Alis Robinson e Zelandës së Re me 484 pikë, ndërsa treshja e parë kompletohet nga italiania Sofia Goxha me 372 pikë sezonale./PanoramaSport
Dh*nohet brutalisht gazetari Elton Tozaj/ Reagimi i familjes: Rrezikon të humbasë shikimin (FOTO)