Një nga emrat më të përfolur të ditëve të fundit në Norvegji është ai i Marius Borg Hoiby, djali i madh i Princeshës Mette-Marit, i cili është vënë nën akuzë për një sërë veprash penale të rënda. Sipas Prokurorisë së Përgjithshme, Hoiby akuzohet për 32 vepra penale, mes tyre katër raste përdhunimi, abuzim ndaj partneres, kufizim të lirisë dhe filmim apo regjistrim pa pëlqimin e viktimave.
Në një konferencë për shtyp, prokurorja e përgjithshme Sturla Henriksbo theksoi se dënimi maksimal për akuzat e ngritura ndaj 27-vjeçarit është deri në 10 vjet burg. “Këto janë akte shumë të rënda që mund të shkaktojnë trauma të përhershme dhe të shkatërrojnë jetë njerëzish”, deklaroi Henriksbo.
Emri i Marius Borg Hoiby-t, i cili është djali që Princesha Mette-Marit pati nga një lidhje para martesës me Princin e Kurorës Haakon, u rikthye në qendër të vëmendjes pas arrestimit të tij më 4 gusht 2024, kur dyshohej se kishte sulmuar partneren e tij. Ky rast çoi më pas në një sërë kallëzimesh dhe dëshmish nga gra të tjera, duke hapur rrugën për një hetim më të gjerë.
Sipas aktakuzës, katër përdhunimet e pretenduara kanë ndodhur gjatë viteve 2018, 2023 dhe 2024, madje njëri prej tyre ndodhi pas nisjes së hetimit policor.
Prokuroria norvegjeze ka theksuar se fakti që Hoiby është pjesë e familjes mbretërore nuk do të ketë asnjë ndikim mbi trajtimin e tij ligjor. “Askush nuk është mbi ligjin”, u shpreh Henriksbo, duke nënvizuar se procesi gjyqësor do të zhvillohet si për çdo qytetar tjetër.
Skandali ka tronditur opinionin publik norvegjez dhe ka vënë sërish në qendër të vëmendjes jetën private të familjes mbretërore. Procesi ndaj Marius Borg Hoiby pritet të nisë së shpejti, ndërsa pritet që detaje të tjera të bëhen publike në ditët në vijim.