Autoritetet italiane kanë shpallur një alarm të ri për rrezik hidrogjeologjik në Siçili, pas dëmeve të shumta të shkaktuara nga cikloni “Harry”, i cili goditi rëndë bregdetin jonian të ishullit.
Alarmi është aktivizuar në qytetin Niscemi, në provincën e Caltanissettas, me rreth 25 mijë banorë, ku rrëshqitje të mëdha dheu nisën ditën e djeshme rreth orës 13:00. Fenomeni ka shkaktuar çarje në rrugë dhe infrastruktura, duke detyruar një pjesë të banorëve të braktisin banesat e tyre.
Situata u përkeqësua nga reshjet e dendura të shiut, të cilat intensifikuan lëvizjen e dheut. Si masë parandaluese, Mbrojtja Civile urdhëroi evakuimin e rreth 500 banorëve që jetojnë në zonat e konsideruara me rrezik të lartë.
Zonat më të prekura përfshijnë lagjen “Santa Croce”, rrethin Belvedere dhe territorin që shtrihet deri në përroin “Benefizio” dhe zonën “Pirillo”.
Kryetari i Bashkisë së Niscemit, Massimiliano Conti, urdhëroi mbylljen e shkollave për ditën e nesërme dhe aktivizoi Qendrën e Operacioneve Komunale për menaxhimin e emergjencës.
Aktualisht, qyteti është i aksesueshëm vetëm në një drejtim, ndërsa rrëshqitjet e dheut kanë arritur një thellësi prej rreth 25 metrash. Me urdhër të shefit rajonal të Mbrojtjes Civile, Salvo Cocina, qindra shtretër kampingu po transportohen nga Palermo drejt palestrës “Pio La Torre”, për t’u përdorur si strehë e përkohshme për të evakuuarit.