Presidenti i SHBA-së, Donald Trump, ka vendosur të zgjatë edhe për 12 muaj urdhrin ekzekutiv që shpall gjendjen e jashtëzakonshme në rajonin e Ballkanit Perëndimor. Ky urdhër, i publikuar në Regjistrin Federal, thekson se situata në Ballkan vazhdon të përbëjë një kërcënim serioz për sigurinë kombëtare dhe politikën e jashtme të SHBA-së.
Në dokument përmenden veprimet e individëve që minojnë paqen dhe proceset e stabilizimit në rajon, duke penguar përparimin demokratik dhe integrimin e Ballkanit në strukturat euroatlantike. Sipas urdhrit, kërcënimet përfshijnë aktet e dhunës ekstremiste dhe aktivitetet përçarëse që ndikojnë në qeverisjen efektive dhe demokratike të vendeve të rajonit.
Ky urdhër u miratua për herë të parë më 26 qershor 2001 nga ish-presidenti George W. Bush, pas luftërave në Ballkan, dhe ka pësuar ndryshime të mëtejshme për të adresuar sfidat që vazhdojnë në rajon, duke përfshirë edhe korrupsionin dhe cenimin e marrëveshjeve pasluftës.
Vendimi i fundit i Trump-it do t’i paraqitet Kongresit dhe shënon vazhdimin e angazhimit amerikan për të monitoruar dhe adresuar situatën në Ballkan Perëndimor.