Kryeministrja italiane Giorgia Meloni vizitoi sot qytetin Niscemi në Sicilinë lindore, ku mbi dy mijë banorë janë detyruar të lënë banesat për shkak të rrëshqitjeve masive të dheut.
Fenomeni u përkeqësua tre javë më parë pas kalimit të uraganit Storm Harry, ndërsa fronti i përgjithshëm i rrëshqitjeve tashmë ka tejkaluar 5 kilometra, duke rrezikuar zona të tëra banimi dhe toka bujqësore.
Gjatë vizitës, Meloni u takua me një komitet qytetarësh dhe njoftoi se qeveria do të alokojë 150 milionë euro për ndërhyrje emergjente dhe afatgjata. Fondet do të përdoren për shembjen e ndërtesave të dëmtuara dhe të pabanueshme, ndërtimin e banesave të reja si dhe për masa mbrojtëse me synim kufizimin e përhapjes së rrëshqitjeve.
Masat konkrete pritet të miratohen të mërkurën përmes një dekreti legjislativ. Ndërkohë, kreu i Mbrojtja Civile Italiane, Fabio Ciciliano, do të marrë rolin e komisionerit të posaçëm qeveritar, përgjegjës për koordinimin dhe zbatimin e ndërhyrjeve në terren.
Paketa e mbështetjes parashikon gjithashtu ndihmë financiare për fermerët që nuk mund të punojnë tokat e tyre, si dhe për banorët e zonës së kuqe, me qëllim garantimin e sigurisë dhe mbrojtjen e komunitetit të prekur.