Murtaja e ruminantëve, një nga sëmundjet më të rrezikshme për bagëtinë, mund të vihet nën kontroll brenda dy muajsh – por vetëm nëse fermerët zbatojnë me përpikëri masat parandaluese.
Eksperti grek i epidemiologjisë veterinare, George Valiakos, i pranishëm në Shqipëri për të ndarë përvojën e vendit të tij, thekson se ndalimi i tregtimit dhe lëvizjes së deleve dhe dhive është thelbësor për të frenuar përhapjen.
“Në Greqi, pati shumë përhapje, por pak asgjësime, falë bashkëpunimit të ngushtë mes veterinerëve dhe fermerëve. Koha është aleati juaj më i madh – temperaturat e larta ndihmojnë në zhdukjen e virusit. Por situata mbetet serioze dhe nuk duhet të neglizhohet asnjëherë”, u shpreh ai.
Valiakos shton se ndonëse ekziston mundësia e vaksinimit, kjo nuk është zgjidhja më e mirë për Shqipërinë që synon tregjet evropiane. “Vaksinimi është i diskutueshëm për shkak të cilësisë së vaksinave dhe rrezikon të përjashtojë vendin nga eksporti i produkteve shtazore për vite me radhë,” paralajmëroi eksperti grek.
Ai rekomandon identifikimin e shpejtë të rasteve, izolimin dhe asgjësimin e kafshëve të infektuara, si dhe hartimin e menjëhershëm të politikave mbështetëse për fermerët e prekur.
“Ne në Greqi kemi dhënë subvencione deri në 200 euro për çdo krerë të humbur dhe kemi siguruar ushqim për tufat e mbetura. Edhe Shqipëria duhet të ndihmojë fermerët në këtë periudhë të vështirë,” theksoi Valiakos.
Murtaja besohet të jetë futur në Shqipëri përmes tregut të paligjshëm të kafshëve, ku qingjat e sëmurë nga Rumania hyjnë pa dokumentacion shëndetësor apo numra identifikimi, duke sjellë një rrezik të madh për blegtorinë vendase.