Këshilli i Ministrave ka miratuar krijimin e një baze të re të dhënash shtetërore, të quajtur “Regjistri për Ekzekutimin dhe Vjeljen e Gjobave”, me synim administrimin më efikas dhe ndjekjen në kohë reale të të gjitha detyrimeve administrative.
Sipas vendimit, institucioni përgjegjës për menaxhimin e këtij regjistri do të jetë Inspektorati i Përgjithshëm, ndërsa sistemi do të funksionojë i ndërlidhur me një sërë databazash të tjera shtetërore.
Regjistri do të përmbajë dy kategori të dhënash:
• Të dhëna parësore, ku përfshihet numri unik i identifikimit të çdo gjobe
• Të dhëna dytësore, të cilat do të merren nga sisteme të ndryshme si Regjistri Kombëtar i Gjendjes Civile, sistemi i gjobave të Policia e Shtetit, platforma e-inspektimi, sistemi DPSHTRR, si dhe regjistrat tatimorë e tregtarë.
Këto të dhëna do të përfshijnë informacione të detajuara për individët dhe subjektet, si identiteti, vendbanimi, shkeljet e kryera, vlera e gjobës, statusi i saj, si dhe të dhëna mbi mjetet apo aktivitetin tregtar.
Regjistri do të shërbejë jo vetëm për mbledhjen e gjobave, por edhe për analiza dhe vlerësime, duke respektuar legjislacionin për mbrojtjen e të dhënave personale. Të dhënat do të përditësohen vazhdimisht dhe do të jenë të aksesueshme sipas katër niveleve të përdoruesve: lexues, institucione shtetërore, administratorë dhe auditues.
Sistemi do të sigurojë gjithashtu gjurmueshmëri për çdo veprim mbi të dhënat, me qëllim garantimin e sigurisë dhe transparencës.
Një nga risitë kryesore është se pagesa e gjobave do të kryhet online përmes platformës e-Albania, e lidhur me sistemin e pagesave elektronike, por edhe përmes mandatpagesave tradicionale.
Për zbatimin e këtij vendimi janë ngarkuar Inspektorati i Përgjithshëm, Agjencia Kombëtare e Shoqërisë së Informacionit dhe të gjitha institucionet që vendosin masa administrative me gjobë.
Vendimi hyn në fuqi pas botimit në Fletoren Zyrtare.
Njoftimi i plotë:
V E N D I M PËR KRIJIMIN E BAZËS SË TË DHËNAVE SHTETËRORE “REGJISTRI PËR EKZEKUTIMIN DHE VJELJEN E GJOBAVE”
Në mbështetje të nenit 100 të Kushtetutës dhe të pikës 1, të nenit 4, të ligjit nr.10325, datë 23.9.2010, “Për bazat e të dhënave shtetërore”, me propozimin e Kryeministrit, Këshilli i Ministrave vendosi:
1. Krijimin e bazës së të dhënave shtetërore “Regjistri për ekzekutimin dhe vjeljen e gjobave” të Sistemit të Qendërzuar të Mbledhjes së Gjobave.
2. Institucioni administrues i bazës së të dhënave shtetërore “Regjistri për ekzekutimin dhe vjeljen e gjobave” është Inspektorati i Përgjithshëm.
3. Të dhënat që përmban Regjistri për Ekzekutimin dhe Vjeljen e Gjobave ndahen në të dhëna parësore dhe në të dhëna dytësore, si më poshtë vijon:
a) Të dhëna parësore:
i. Numri unik i identifikimit të gjobës.
b) Të dhëna dytësore:
i. Regjistri Kombëtar i Gjendjes Civile për të dhënat, si më poshtë:
– Emri;
– Emri i babait;
– Mbiemri;
– Numri personal;
– Datëlindja;
– Vendlindja;
– Gjinia;
– Shtetësia;
– Vendbanimi;
– Vendqëndrimi.
ii. Sistemi elektronik i gjobave të Policisë së Shtetit:
– Data;
– Ora;
– Adresa ku është vënë gjoba;
– Shkeljet ligjore;
– Vlera e gjobës;
– Masat plotësuese (heqje pikësh, heqje patente, pezullim patente).
iii. Sistemi e-Inspektimi:
– Institucioni (Inspektorati Qendror dhe ai vendor);
– Numri i vendimit përfundimtar (numër çështjeje);
– Data e vendimit;
– Subjekti;
– Shkelja ligjore;
– Dënimi administrativ gjobë (kryesore plotësues);
– Vlera e gjobës;
– Statusi i gjobës.
iv. Sistemi elektronik e-DPSHTRR për të dhënat që lidhen me të dhënat teknike të mjetit, duke përfshirë:
– numrin e regjistrimit;
– numrin e identifikimit të mjetit;
– llojin/tipin e mjetit;
– markën;
– emërtimin tregtar;
– ngjyrën;
– numrin e serisë së lejes së qarkullimit dhe të certifikatës së pronësisë;
– dokumentacionin vërtetues të gjendjes së mjetit.
v. Regjistri elektronik i tatimpaguesve i Drejtorisë së Përgjithshme të Tatimeve për të dhënat e tatimpaguesit:
– NIPT-i.
vi. Regjistri tregtar për të dhënat, si më poshtë:
– Emri i subjektit;
– NUIS;
– Aktiviteti;
– Data e regjistrimit;
– Statusi i subjektit;
– Përshkrimi i objektit;
– Adresa e subjektit;
– Adresa elektronike e subjektit;
– Numri i kontaktit të subjektit;
– Administratori.
4. Regjistri për Ekzekutimin dhe Vjeljen e Gjobave, si bazë të dhënash, funksionon, administrohet e ndërvepron me bazat e tjera të të dhënave, në përputhje me pikën 9 të këtij vendimi.
5. Të dhënat e mbledhura nga Regjistri për Ekzekutimin dhe Vjeljen e Gjobave mund të përdoren për analiza dhe vlerësime. Në çdo rast, përpunimi i të dhënave realizohet në përputhje me parimet e kriteret e legjislacionit në fuqi për mbrojtjen e të dhënave personale.
6. Të dhënat e Regjistrit për Ekzekutimin dhe Vjeljen e Gjobave përditësohen periodikisht nga struktura përgjegjëse, sa herë është e nevojshme apo ka ndryshime të këtyre të dhënave.
7. Përdoruesit e bazës së të dhënave janë të përcaktuar në 4 nivele:
a) lexues;
b) institucion shtetëror;
c) administrator;
ç) auditues.
8. Për çdo veprim në Regjistrin për Ekzekutimin dhe Vjeljen e Gjobave lidhur me aksesin, ndryshimin, korrigjimin, përhapjen e të dhënave personale, duhet të sigurohet gjurmueshmëria, me qëllim garantimin e konfidencialitetit e të integritetit, disponueshmërinë dhe qëndrueshmërinë e sistemeve dhe të shërbimeve të përpunimit.
9. Baza e të dhënave të Regjistrit për Ekzekutimin dhe Vjeljen e Gjobave ndërvepron nëpërmjet shkëmbimit elektronik të të dhënave me bazën e të dhënave shtetërore:
a) Regjistri tregtar;
b) Regjistri Kombëtar i Gjendjes Civile;
c) Sistemi elektronik i gjobave të Policisë së Shtetit;
ç) Sistemi e-Inspektimi;
d) Sistemi elektronik e-DPSHTRR;
dh) Regjistri elektronik i tatimpaguesve;
e) Regjistri i pronarëve përfitues.
10. Pagesa e gjobave do të bëhet on-line në portalin “e-Albania” nëpërmjet shërbimit të dedikuar elektronik, i ndërlidhur me platformën e pagesave elektronike, si dhe me mandatpagesë.
11. Ngarkohen Inspektorati i Përgjithshëm, Agjencia Kombëtare e Shoqërisë së Informacionit dhe institucionet shtetërore përgjegjëse për vendosjen e masës administrative “gjobë” për zbatimin e këtij vendimi.
Ky vendim hyn në fuqi pas botimit në “Fletoren zyrtare”.