Kryeministri Edi Rama ka zhvilluar episodin e fundit për vitin 2025 të podcastit “Flasim”, ku mbajti një deklaratë të gjatë reflektuese mbi situatën politike, mediatike dhe zhvillimet që, sipas tij, po shënojnë transformimin e Shqipërisë.
Në fjalën e tij, Rama kritikoi ashpër atë që e cilësoi si “histeri politike dhe mediatike”, duke theksuar se, pavarësisht sulmeve, linçimeve dhe dezinformimit, Shqipëria po ecën përpara në procesin e integrimit europian.
Sipas kryeministrit, vendi ka hapur të gjithë kapitujt e negociatave për anëtarësim në Bashkimin Europian dhe po shënon arritje të rëndësishme në disa sektorë kyç, përfshirë turizmin, ekonominë, digjitalizimin dhe infrastrukturën. Rama u ndal edhe te paga mesatare, e cila sipas tij ka arritur në 830 euro, si dhe te zhvillimi i aeroportit të Tiranës, që sipas tij ka tejkaluar për disa vite radhazi aeroportin e Beogradit për nga fluksi.
Kreu i qeverisë theksoi gjithashtu objektivin e sovranitetit energjetik, duke deklaruar se brenda mandatit të katërt Shqipëria do të kthehet në eksportuese neto të energjisë elektrike. Rama përmendi edhe rilindjen e industrisë ushtarake dhe faktin që Shqipëria do të presë Samitin e NATO-s në vitin 2027.
Një pjesë e rëndësishme e fjalës së tij iu kushtua Reformës në Drejtësi. Rama deklaroi se lufta kundër korrupsionit dhe pavarësia e drejtësisë nuk do të ndalen, duke theksuar se për herë të parë, sipas tij, një forcë politike në pushtet ka hapur rrugën që drejtësia të veprojë edhe ndaj vetë politikës.
“Ne do të vazhdojmë të mbështesim organet e drejtësisë dhe do të mbetemi garantët e palëkundur të Reformës në Drejtësi”, u shpreh Rama, duke shtuar se objektivi final mbetet anëtarësimi i Shqipërisë në Bashkimin Europian.