Një ngjarje e rrezikshme është regjistruar këtë pasdite në liqenin e Pogradecit, ku dy peshkatarë, babë e bir, kanë rrezikuar jetën për shkak të motit të keq. Ata kishin dalë për peshkim me varkë, por stuhia e shiut, dallgët e forta dhe era e fuqishme i detyruan të kërkonin ndihmë.
Pas marrjes së sinjalizimit në sallën operative të Drejtorisë Vendore për Kufirin dhe Migracionin Korçë, shërbimet e Policisë Kufitare ndërhynë menjëherë. Me anë të mjetit lundrues “Skaf”, policia lokalizoi varkën rreth 1.5 milje larg bregut dhe bëri të mundur nxjerrjen e sigurt të dy shtetasve në tokë.
Fatmirësisht, babai dhe i biri ndodhen në gjendje të mirë shëndetësore. Ata kanë falënderuar Policinë Kufitare për reagimin e shpejtë dhe profesionalizmin e treguar.
Policia Kufitare vijon të mbetet e angazhuar në shërbim të qytetarëve, duke ftuar këdo që gjendet në rrezik të kontaktojë numrin pa pagesë 112.