Këngëtarja e njohur kosovare Shkurte Fejza ishte e pranishme sot në sheshin “Skënderbej” në Tiranë, ku po zhvillohet protesta në mbështetje të luftëtarëve të UÇK-së që po gjykohen në Hagë.
Fejza këndoi për protestuesit hitin e saj “Mora fjalë”, duke shprehur mbështetjen dhe respektin për luftëtarët që sipas saj po gjykohen padrejtësisht. “Është emocion. Janë të gjithë shqiptarë nga të gjitha trojet për të mbështetur luftëtarët e UÇK-së, heronjtë tanë, që po gjykohen padrejtësisht. Për mua është një kënaqësi të jap kontribut sadopak me këngën time”, tha ajo mes emocioneve, duke veshur simbole kombëtare dhe të UÇK-së.
Këngëtarja falënderoi gjithashtu organizatorët dhe të gjithë shqiptarët që u bënë pjesë e protestës, duke theksuar rëndësinë e unitetit kombëtar: “Shqiptarët kanë nevojë të jenë bashkë. Një popull që nderon heronjtë është i pavdekshëm”, përfundoi Fejza.
Protesta e sotme ka bashkuar qytetarë nga Shqipëria, Kosova dhe diaspora, të cilët mbajnë flamuj dhe pankarta për të shprehur solidaritetin me ish-udhëheqësit dhe luftëtarët e UÇK-së.