Policia Kufitare dhe Njësia Policore Detare kanë bllokuar një mjet lundrues tip Jet Ski në ujërat territoriale shqiptare, përballë fshatit Tushemisht, i cili po transportonte 7 persona.
Nga verifikimet u konstatua se mjeti kishte hyrë në mënyrë të paligjshme duke shkelur kufirin shtetëror. Jet Ski-ja u shoqërua në Stacionin e Policisë, bashkë me personat që ndodheshin në bord.
Pas përfundimit të procedurave, Policia vendosi gjoba administrative prej 10 mijë lekësh për një të mitur dhe 50 mijë lekë për secilin nga 6 shtetasit madhorë, ndërsa mjeti u bllokua. Personat do të largohen vullnetarisht nga pika kufitare Tushemisht.
Drejtoria Vendore për Kufirin dhe Migracionin Korçë theksoi se do të reagojë menjëherë dhe paanshmërisht ndaj çdo shkeljeje të ligjit.