Policia italiane ka dhënë një goditje të fortë tregut të drogës në komunën e Boara Pisani, në zonën e poshtme të Padovës, duke arrestuar katër gra, mes tyre tre shtetase shqiptare, të cilat dyshohet se ishin pjesë e një bande që po përgatitej të hidhnin në treg 61 kilogramë hashash. Sasia e sekuestruar, që do të arrinte vlera disa mijëra euro, u kap në flagrancë gjatë një operacioni të mirëorganizuara nga hetuesit italianë.
Prokurorja Publike e Rovigos njoftoi se ndaj të katër të dyshuara janë ngritur akuza për “transport dhe posedim të rëndë të një sasie të madhe narkotikësh”. Të arrestuarat janë: E.Z., 29 vjeç, banore e Rovigos; F.T., 32 vjeç, gjithashtu banore e Rovigos; A.M., 26 vjeç, banore e Villadosas (Rovigo); dhe A.D.P., 21 vjeç, banore italiane e Rovigos, e cila ishte e vetmja e panjohur për forcat e rendit.
Gjatë kontrollit në shtëpitë e disa të dyshuarave, forcat e rendit sekuestruan jo vetëm 61 kilogramë hashash, por edhe materiale për paketimin e drogës në doza individuale dhe një shumë prej 36 mijë eurosh në para të gatshme, të cilat besohet se ishin përfitime nga aktivitetet e mëparshme kriminale.
Zyra e Prokurorit Publik të Rovigos kërkoi dhe mori nga gjyqtari i hetimeve paraprake vlefshmërinë e arrestimeve të të katër të dyshuarave dhe urdhrin për paraburgimin e tyre. Operacioni tregon angazhimin e autoriteteve italiane në luftën kundër trafikut të drogës dhe goditjen e grupeve kriminale që veprojnë në rajon.