Kukësi është goditur nga moti i keq në orët e para të mëngjesit të sotëm, me erëra të forta, shtrëngata dhe reshje intensive shiu.
Spektakli i pazakontë në qiellin e qytetit nisi me shkarkesa të forta elektrike. Rrufe të njëpasnjëshme ndriçuan horizontin, ndërsa bubullimat e fuqishme zgjuan banorët. Pas tyre, reshjet e shiut vijuan pandërprerë për gati tre orë, duke përfshirë jo vetëm Kukësin, por edhe të gjithë zonën veriore të vendit.
Këto reshje kanë pasur një ndikim pozitiv, pasi kanë ndihmuar në shuarjen e disa vatrave aktive të zjarrit, që prej ditësh shqetësonin banorët dhe strukturat e emergjencës, sidomos në zonën e Fushë Arrëzit.
Nga ana tjetër, reshjet e dendura kanë shkaktuar rrëshqitje dherash dhe gurësh në disa akse rrugore, si në rrugët rurale ashtu edhe në ato nacionale që lidhin Kukësin me zonat përreth. Megjithatë, deri më tani nuk raportohet për bllokime të plota apo dëme serioze.
Autoritetet vendore ndodhen në terren, duke monitoruar situatën dhe duke ndërhyrë për pastrimin e akseve nga inertet.