Gjykata e Shkodrës ka vendosur lirimin e shtatë të rinjve të ndaluar pas një sherri të dhunshëm mes adoleshentësh pranë një shkolle në lagjen Xhabije. Mes tyre janë edhe dy të rriturit, Klevin Thepi, 24 vjeç, dhe Doronesto Kulla, 19 vjeç.
Të rinjtë u ndaluan nga Policia e Shkodrës pas konfliktit të ndodhur të premten në ambientet e jashtme të shkollës, ku u përdorën mjete të forta dhe mjete prerëse. Si pasojë e përplasjes, tre persona përfunduan në spital me plagë të shumta, por jashtë rrezikut për jetën.
Fillimisht, Thepi dhe Kulla u dërguan në paraburgim, ndërsa pesë të tjerët, të mitur, u proceduan penalisht në gjendje të lirë. Këtë të hënë, të gjithë u paraqitën para trupit gjykues, ku u njohën me akuzat, ndërsa gjykata vendosi ndaj tyre masën e sigurisë “detyrim paraqitje”.
Ndërkohë, avokati mbrojtës i dy prej të miturve deklaroi se ndalimi i tyre është vlerësuar si i paligjshëm.