Një ngjarje e rëndë mësohet të ketë ndodhur mbrëmjen e djeshme në qytetin e Kukësit.
3 të mitur të moshës 14-15 vjeç janë përfshirë në një sherr që ka agrevuar deri në plagosje me thikë.
Si pasojë e këtij konflikti fizik ka mbetur i plagosur njëri nga personat e përfshirë në këtë ngjarje, i cili është shoqëruar për në ambientet e spitalit.
Sipas hulumtimeve mësohet se veprimet hetimore po kryhen në praninë e psikologut, familjarëve dhe Prokurorit.
Njoftimi i Policisë
Rreth orës 20:30, në qytetin e Kukësit, pranë Muzeut, dyshohet se gjatë një konflikti të çastit është plagosur me mjet prerës një 15- vjeçar, i cili është dërguar në spital për ndihmë mjekësore.
Shërbimet e Policisë kanë shkuar menjëherë në vendngjarje bashkë me grupin hetimor dhe vijojnë punën për identifikimin dhe kapjen autorit/ve, si dhe sqarimin e plotë të rrethanave të ngjarjes.
Në vijim të informacionit paraprak të dhënë për plagosjen me mjet prerës të një 15 vjeçari gjatë një konflikti, të ndodhur në qytetin e Kukësit, ju informojmë se:
Falë veprimeve të shpejta, shërbimet e Policisë Kukës, identifikuan dhe shoqëruan në Komisariat për veprime të mëtejshme, një 15 vjeçar që dyshohet si autor, si dhe një 14 vjeçar që është përfshirë në konflikt mes dy 15 vjeçarëve.
Shërbimet e Policisë gjetën dhe sekuestruan në cilësinë e provës materiale mjetin prerës (thikë) që dyshohet se është përdorur gjatë konfliktit, ku mbeti i plagosur 15 vjeçari.
Veprimet hetimore po kryhen në praninë e psikologut, Prokurorit dhe familjarëve të të miturve.