Shtetet e Bashkuara kanë nisur një operacion ushtarak në Siri, si përgjigje ndaj vrasjes së tre shtetasve amerikanë gjatë një sulmi të ndodhur rreth një javë më parë. Lajmi u konfirmua të premten nga Sekretari amerikan i Mbrojtjes, Pete Hegseth.
Sipas tij, operacioni ka për qëllim shkatërrimin e luftëtarëve të ISIS-it, si dhe të infrastrukturës dhe objekteve të tyre ushtarake. Zyrtarë amerikanë e përshkruan aksionin si një seri goditjesh në shkallë të gjerë, të kryera në disa zona të Sirisë qendrore, ku ishin identifikuar struktura dhe armatime të grupit ekstremist. Ata paralajmëruan se operacionet mund të vazhdojnë edhe në ditët në vijim.
Sulmet u realizuan me avionë luftarakë F-15 Eagle dhe F-16, helikopterë Apache, si dhe me sistemin raketor HIMARS, në bashkëpunim me forca aleate nga rajoni.
Në një deklaratë publike, Hegseth theksoi se ky veprim nuk përbën nisjen e një lufte të re, por një reagim ndaj sulmit vdekjeprurës, duke shtuar se SHBA nuk do të hezitojë të mbrojë qytetarët dhe trupat e saj.
Presidenti amerikan Donald Trump kishte paralajmëruar më herët një kundërpërgjigje të fortë, pasi tre amerikanë – dy pjesëtarë të Gardës Kombëtare të Ajovës dhe një përkthyes civil – u vranë në një sulm në shkretëtirën siriane më 13 dhjetor. Autoritetet amerikane ia atribuuan përgjegjësinë ISIS-it. Viktimat ishin pjesë e forcave amerikane të dislokuara në Sirinë lindore, në kuadër të koalicionit ndërkombëtar kundër këtij grupi.
Operacioni shihet gjithashtu si një test për marrëdhëniet mes SHBA-së dhe Sirisë, një vit pas rrëzimit të ish-presidentit Bashar al-Assad. Trump ka deklaruar se autoritetet siriane po bashkëpunojnë me forcat amerikane dhe se presidenti aktual sirian, Ahmad al-Sharaa, është shprehur i tronditur nga sulmi ndaj amerikanëve.
Sipas mediave shtetërore siriane, goditjet ajrore kanë shënjestruar zona rurale në provincat Deir ez-Zor dhe Raqqa, si dhe rajonin Jabal al-Amour pranë Palmyra, ku ndodheshin depo armësh dhe objekte të përdorura nga ISIS-i për operacionet e tij.