Për herë të parë në Porto Romano ka mbërritur një anije luftarake amerikane, anija “USS Mount Whitney”. Ankorimi i saj është një tregues i fortë i partneritetit strategjik mes Shqipërisë dhe Shteteve të Bashkuara në fushën e sigurisë dhe mbrojtjes.
Për të festuar këtë ngjarje, pasditen e sotme u zhvillua një ceremoni e posaçme në bordin e anijes, ku morën pjesë zyrtarë të lartë shqiptarë, mes tyre Presidenti i Republikës, Bajram Begaj, Kryetarja e Kuvendit, Elisa Spiropali, dhe Ministri i Mbrojtjes, Pirro Vengu.
E Ngarkuara me Punë e ambasadës së SHBA në Tiranë, Nancy VanHorn, shprehu mirënjohjen ndaj Presidentit Begaj për partneritetin e ngushtë:
“Vendet tona janë më të forta dhe më të sigurta për shkak të lidhjes sonë historike dhe miqësisë së fortë.”
VanHorn solli shembullin e komandantit shqiptaro-amerikan Alban Dervishi, i cili së fundmi mori komandën e Anijes së SHBA-së “Pearl Harbor” dhe kishte shërbyer më parë në anijen “Mount Whitney”:
“Edhe ai ka shërbyer në Anijen e SHBA-së ‘Mount Whitney’, si një oficer i operacioneve, ndërsa ngjitej në gradat e marinës amerikane. Sot, ai shërben në vijën e parë, në ruajtje të sigurisë në rajonin e Indo-Paqësorit.”
VanHorn theksoi se siguria është ajo që i ka bashkuar të dy vendet:
“Jemi këtu për shkak të angazhimit tonë të përbashkët për mbrojtjen kolektive dhe ruajtjen e popujve tanë.”
Ajo shtoi se anija “Mount Whitney” simbolizon fazën tjetër të modernizimit ushtarak të Shqipërisë:
“Anija e SHBA ‘Mount Whitney’ – Anija e Komandës së Flotës së 6-të – që ankorohet këtu në Porto Romano simbolizon fazën tjetër të modernizimit ushtarak të Shqipërisë.”
VanHorn nënvizoi se Shtetet e Bashkuara mirëpresin zhvillimin e një baze detare me kapacitet portual mallrash në ujëra të thella në Porto Romano:
“Investimi i Shqipërisë në përforcimin e Porto Romanos do t’i tregojë rajonit – dhe të gjithë Europës – aftësinë e Shqipërisë për të qenë një drejtuese e vërtetë në Aleancën e NATO-s.”
Sipas saj, Shqipëria është një aset jetik për NATO-n për shkak të vendndodhjes strategjike, dhe përforcimi i Porto Romanos do ta bëjë vendin një rrugë thelbësore për operacione të mundshme në Krahun Lindor të Aleancës:
“Përforcimi i Porto Romanos do të ndihmojë në sigurimin e linjave të komunikimit detar dhe në stabilizimin e transportit të materialeve ushtarake përmes kufijve. Gjithashtu, do të dërgojë një sinjal të qartë për të gjithë ata që kërkojnë të destabilizojnë sigurinë transatlantike: Ne jemi të aftë, ne jemi të bashkuar dhe ne jemi të angazhuar ndaj mbrojtjes kolektive në tokë, në ajër dhe në det.”
VanHorn theksoi gjithashtu përfitimet ekonomike:
“Përtej përfitimeve të sigurisë, përforcimi i Porto Romanos do të kontribuojë për begatinë më të gjerë ekonomike të Shqipërisë – që nga rritja e tregtisë e deri te nxitja e projekteve të reja infrastrukturore që krijojnë vende pune.”
Ajo shtoi se portet e ujërave të thella të nevojshme për anijet e marinës aleate janë të pakta në Adriatik, dhe Porto Romano mund të plotësojë këtë nevojë:
“Portet në ujëra të thella që u duhen anijeve të marinës së aleatëve si Anija e SHBA ‘Mount Whitney’ për t’u rifurnizuar ose për t’iu siguruar ekuipazheve të tyre pushim dhe çlodhje, janë të pakët në numër në Adriatik.”
VanHorn e përmbylli fjalën me një apel për bashkëpunim dhe angazhim të përbashkët:
“Së bashku, do të vazhdojmë të forcojmë partneritetin historik të mbrojtjes dhe sigurisë midis Shqipërisë dhe Shteteve të Bashkuara, të mbrojmë territoret tona dhe të ruajmë popujt tanë.”
Ndërsa Kryetarja e Kuvendit, Elisa Spiropali, ndau një foto nga bordi i anijes dhe vuri në dukje rëndësinë simbolike të ngjarjes:
“Në bordin e ‘Mount Whitney’, anija e parë luftarake që ankorohet në Porto Romano, me kapitenin Colin Price që drejton ekuipazhin e marinës në këtë ndalesë e cila simbolizon aleancën e pathyeshme Shqipëri-SHBA si faktor i sigurisë dhe stabilitetit rajonal e më gjerë.”