Është zhvilluar këtë të mërkurë seanca e radhës në Gjykatën e Posaçme (GJKKO) për çështjen “Gërdeci”, ku ish-ministri i Mbrojtjes Fatmir Mediu përballet me akuzat për shpërdorim detyre dhe shkelje të procedurave gjatë ngritjes së fabrikës së demontimit të armëve.
Gjatë seancës, Mediu ka kundërshtuar akt-ekspertizën e paraqitur nga grupi i ekspertëve të ngarkuar nga prokuroria, duke kërkuar që gjykata të marrë parasysh edhe dëshmitë e disa personaliteteve politike dhe ushtarake të kohës, të dhëna në Shtetet e Bashkuara.
Sipas Mediut, gjashtë kongresmenë amerikanë i kanë dërguar një letër zyrtare Ministrisë së Drejtësisë së Shqipërisë, ku kërkojnë që deklarimet e dhëna nën betim në SHBA (afidavit), të cilat kanë vlerën e provës në sistemin amerikan të drejtësisë, të pranohen si prova në këtë proces gjyqësor.
Kjo kërkesë e Mediut vjen pasi GJKKO kishte refuzuar më herët thirrjen e këtyre dëshmitarëve për të dëshmuar në Shqipëri.
Seanca e radhës për këtë çështje është caktuar më datë 24 qershor, ora 13:00.