Ish-ministrja e Jashtme, Elisa Spiropali, nuk e ka fshehur asnjë moment acarimin dhe zhgënjimin ndaj kryeministrit Edi Rama pas vendimit për largimin e saj nga detyra. Gjatë seancës plenare të sotme, ku u diskutua dekreti i presidentit për emërimin e ministrave të rinj, Spiropali përdori një mesazh të koduar për Ramën, duke lënë të kuptohet se informacioni për shkarkimin e saj i kishte shkuar më parë Sali Berishës.
“Jam e qartë, jam e qetë. E vetmja gjë për të cilën më vjen keq është që largimin tim e paralajmëroi Sali Berisha në sallën e Kuvendit dhe jo ndonjë tjetër. Vetëm për këtë jam e habitur, që i doli fjala, për asgjë tjetër,” deklaroi Spiropali gjatë një replike në Parlament, duke nënvizuar se kjo ishte arsyeja e vetme e surprizës së saj.
Ndërkohë, në një zhvillim të pazakontë, deputetët e Partisë Demokratike, Sali Berisha dhe Jozefina Topalli, votuan kundër shkarkimit të Spiropalit. Edhe pse opozita nuk kurseu kritikat dhe akuzat ndaj ish-ministres për mënyrën se si kishte drejtuar diplomacinë shqiptare, dy veteranët e PD-së dolën në mbrojtje të saj, duke refuzuar të japin votën për largimin e ministres.
Megjithatë, mbështetja e Berishës dhe Topallit nuk mjaftoi. Me votat e socialistëve, Spiropali u shkarkua zyrtarisht nga detyra.