Pas lirimit nga burgu, ish-deputeti i Partisë Demokratike, Ervin Salianji, u shfaq përpara mediave në selinë e PD-së, ku deklaroi se burgosja e tij ishte politike dhe se nuk ka ndërmend të tërhiqet nga jeta publike.
Në një konferencë për shtyp, Salianji akuzoi Gjykatën e Lartë për manipulim të shortit në përzgjedhjen e trupës gjykuese që shqyrtoi rekursin e tij. Ai bëri të ditur se i është drejtuar SPAK-ut për hetim, duke kërkuar shpjegime pse u ndryshua trupa e caktuar fillimisht dhe në vend të saj u vendos një tjetër “me miqësi”.
“Kam kërkuar nga SPAK të hetojë këtë ndërhyrje të rëndë në drejtësi. Trupa që shqyrtoi çështjen time nuk ishte ajo e dalë me short. Ky është falsifikim,” tha ai.
Salianji shtoi se vonesa në zbardhjen e vendimit të Gjykatës së Lartë është e qëllimshme dhe ndodh, sipas tij, me “urdhër politik” për ta mbajtur të bllokuar.
“Jam gati për përballjen në Gjykatën Evropiane të të Drejtave të Njeriut. Me zor e pres, që të përcaktohet njëherë e mirë kush kishte të drejtë – unë apo qeveria,” theksoi ai.
Pavarësisht ndalimit për të ushtruar funksione publike për pesë vite, Salianji u shpreh se do të mbetet aktiv politikisht dhe se angazhimi i tij nuk do të ndalet.