Ish-ambasadori italian në Sarajevë, Michael Giffoni, ka hedhur dritë mbi një prej kapitujve më të errët të luftës në Bosnjë, duke treguar se në vitin 1994 qarkullonin informacione se qytetarë të pasur, mes tyre edhe italianë, paguanin për të qëlluar me snajper mbi Sarajevën e rrethuar.
“Nuk kam asnjë problem të tregoj gjithçka që di. Kjo histori më ka shqetësuar thellë që atëherë”, tha Giffoni për “La Repubblica”.
Ai kujton se sapo mbërriti në Sarajevë, në një qytet të shënjestruar çdo ditë nga snajperët serbë, dëgjoi për herë të parë termin “Safari snajperësh”, një praktikë makabre ku persona të pasur dhe aventurierë dërgoheshin në kodrat e rrethimit për të qëlluar ndaj civilëve.
“Sapo shkova atje, në 1994, më thanë: ‘E dini, ka Safari.’ Kishte njerëz të pasur që vinin nga të gjitha anët. I çonin në pozicione të larta, paguanin, dhe më pas gjithçka u bë e qartë”, tregon ai.
Sipas Giffonit, inteligjenca boshnjake raportoi se mes snajperëve kishte edhe shtetas të huaj, përfshirë italianë. Këto informacione iu përcollën shërbimeve sekrete italiane (SISMI), të cilat më vonë konfirmuan se kishin gjurmuar organizatorët e fenomenit, por pa dhënë emra apo prova konkrete.
“Informacionet për snajperët italianë na u konfirmuan nga shefi i Subashit, Mustafa Hajrulahovi. Ne ia kaluam të dhënat Romës dhe, pas disa muajsh, ata na thanë se gjurmët ishin ndjekur dhe se çështja ishte zgjidhur. Por emra nuk pati”, shpjegon Giffoni.
Ai shton se nëse do të kishte identitete të verifikuara, Italia do të kishte hapur procedime penale, por rrjedha e informacionit u ndalua dhe çështja nuk u çua më tej.