“Prona është e shenjtë, nuk është privilegj”
Avokatja Alesia Balliu ka reaguar sërish lidhur me protestën e banorëve të Rrjollit, duke theksuar se e drejta e pronës është një e drejtë themelore dhe e panegociueshme.
Sipas saj, asnjë “investim” nuk mund të justifikojë cenimin e së drejtës kushtetuese të qytetarëve për pronën e tyre.
“E drejta për pronën është e shenjtë. Ajo nuk është privilegj, është e drejtë kushtetuese.
Banorët e Rrjollit kanë të drejtën ligjore, morale dhe njerëzore të mbrojnë tokën e tyre. Pronën nuk e fal historia, nuk e negocion presioni dhe nuk e zhduk interesi privat.
Asnjë ‘investim’ nuk mund të qëndrojë mbi cenimin e së drejtës themelore të qytetarëve për pronën e tyre. Në një shtet të së drejtës, zhvillimi nuk ndërtohet mbi uzurpim. Ai ndërtohet mbi ligj, transparencë dhe pëlqim të lirë.
Kur qytetarët detyrohen të dalin në mbrojtje të pronës së tyre, problemi nuk është protesta, problemi është padrejtësia.
Sot është Rrjolli. Nesër mund të jetë çdo tokë, çdo familje, çdo qytetar.
Prona është e drejtë. E drejta nuk negociohet me forcë,” thekson Alesia Balliu.