Psikologia Valbona Treska, e ftuar në emisionin Top Story, ka ngritur shqetësimin për përkeqësimin e shëndetit mendor në Shqipëri, veçanërisht pas pandemisë së COVID-19.
Ajo theksoi se numri i rasteve me depresion është rritur 3 deri në 4 herë krahasuar me periudhën para pandemisë, ndërsa referoi të dhënat e OBSH-së, sipas të cilave 1 në 7 persona globalisht janë të prekur nga çrregullime mendore. Në Shqipëri, tha ajo, kjo shifër është edhe më e lartë: rreth 1 në 5 persona.
“Shpesh as vetë individët dhe familjarët nuk arrijnë ta kuptojnë që kanë të bëjnë me një problem të shëndetit mendor. Për më tepër, stigma ndaj kësaj çështjeje e vështirëson edhe më shumë raportimin apo kërkimin e ndihmës,” tha Treska.
Ajo theksoi nevojën urgjente për një depistim të gjerë të popullatës për të kuptuar realisht përmasat e problemeve mendore. Sipas saj, qendrat e shëndetit mendor dhe psikologët kanë përjetuar një fluks të shtuar kërkesash që pas pandemisë, çka tregon ndërgjegjësimin në rritje, por edhe përkeqësimin e situatës.
Ndër pasojat psikologjike që COVID-19 ka lënë, ajo përmendi edhe rënien masive të flokëve, e cila ka ndikuar negativisht në vetëvlerësimin e individëve, duke shtuar shqetësimet me ankthin dhe depresionin.