Ministri i Shtetit për Pushtetin Vendor, Arbjan Mazniku tha sot se, “po përgatiten ndryshime rregullative, që tokat e lira publike, të mund t’i kalohen në përdorim bizneseve që kanë plane zhvillimi”.
Ministri Mazniku i shoqëruar edhe nga kryetari i bashkisë Gramsh, Besian Ajazi, vizituan në Gramsh, një biznes familjar që prodhon ambalazhe të riciklueshme dhe i eksporton ato në tregun europian.
Mazniku tha se, vëllezërit Miraka, pasi morën zanat në emigracion, u kthyen dhe themeluan biznesin e tyre “Eko Letër”, një sipërmarrje që prodhon ambalazhe të ndryshme të riciklueshme për eksport.
“Falë klimës fiskale favorizuese, ata e zgjeruan aktivitetin në Gramsh dhe sot kanë punësuar rreth 100 persona”, u shpreh Mazniku.
Përfaqësuesi i kompanisë, tregoi se tashmë biznesi ka hyrë në një fazë të re zhvillimi dhe synon ta zgjerojnë biznesin me investime në hapësira të reja.
Ai tha se tregu ka kërkesë për produktet e ambalazheve, teksa vuri në dukje se është në pritje për mbylljen e dy kontratave të reja me Italinë.