Nga 1 nëntori ka hyrë në fuqi përsëri regjimi i lëvizjes pa kontrolle kufitare për automjetet me targa shqiptare dhe kosovare. Ky lehtësim do të zgjasë deri më 28 shkurt 2026, duke u aplikuar në të gjitha pikat e përbashkëta kufitare mes dy vendeve.
Gjatë kësaj periudhe, kontrollet do të kryhen vetëm për mjetet me targa të huaja, por edhe ato do të kalojnë me procedurë të përshpejtuar për të shmangur vonesat në pika si Morina dhe Vermica.
Regjimi pa kontrolle u rikthye pas pezullimit njëmujor në tetor, periudhë në të cilën u zhvilluan kontrolle rutinë dhe regjistrime të mjeteve. Edhe atëherë, fundjavat dhe ditët e festave kanë mbetur të lira nga kontrollet për qytetarët e të dy vendeve.
Marrëveshja e përbashkët mes Shqipërisë dhe Kosovës synon të lehtësojë qarkullimin kufitar dhe të shmangë trafikun e rënduar, sidomos gjatë sezonit turistik. Sipas saj, periudhat e lëvizjes pa kontrolle janë nga 1 maj deri më 30 shtator, dhe nga 1 nëntor deri më 28 shkurt, duke ofruar në total 9 muaj në vit me kalim të lirë për qytetarët e të dy vendeve.