Jennifer Lopez pritet të marrë kontrollin e plotë të rezidencës luksoze në Beverly Hills, pasi ish-bashkëshorti i saj, Ben Affleck, ka hequr dorë nga pjesa e tij në pronë.
Sipas dokumenteve gjyqësore, dyshja ka ndryshuar marrëveshjen e ndarjes së pasurisë, duke i kaluar praktikisht Lopez-it të gjithë pronësinë mbi vilën e blerë në maj 2023 për rreth 61 milionë dollarë.
Dokumentet e reja, të dorëzuara më 9 prill, tregojnë se këngëtarja dhe aktorja do të jetë gjithashtu përgjegjëse për çdo shpenzim që lidhet me një shitje të mundshme të ardhshme të rezidencës, përfshirë taksat, komisionet dhe kostot e transaksionit.
Ndërkohë, burime për TMZ pretendojnë se Affleck i ka kaluar pjesën e tij Lopez-it pa kërkuar kompensim, duke i lënë asaj të drejtën e plotë për çdo fitim të ardhshëm nga shitja.
Vila luksoze, e njohur si “Wallingford”, përfshin 12 dhoma gjumi dhe 24 banjo, dhe ka kaluar disa herë në treg pa arritur të shitet. Fillimisht u nxor në shitje për 68 milionë dollarë, më pas u ul në 52 milionë dollarë, por pa sukses për të gjetur blerës.
Pas ndarjes, të dy kanë vijuar jetën në prona të reja. Affleck ka blerë një shtëpi rreth 20 milionë dollarë në Pacific Palisades, pranë zonës ku jeton ish-bashkëshortja e tij, Jennifer Garner.
Nga ana tjetër, Lopez ka investuar rreth 21 milionë dollarë në një pronë të re në Calabasas, të cilën po e rinovon sipas preferencave të saj.
Divorci i çiftit u finalizua në fillim të vitit 2025, pasi Lopez kishte depozituar kërkesën në gusht 2024, në përvjetorin e dytë të martesës së tyre.