Në brigjet shqiptare të Liqenit të Ohrit, arkeologët kanë zbuluar gjurmët e një vendbanimi të lashtë, që mendohet të jetë më i vjetri në një liqen evropian, sipas një raportimi të agjencisë Reuters.
Sipas studiuesve nga Universiteti i Bernës në Zvicër dhe ekspertëve shqiptarë, vendbanimi prehistorik në fshatin Lin daton rreth 6 000 deri në 8 000 vjet më parë, duke e bërë atë rreth 500 vjet më të vjetër se zbulimet e ngjashme në Alpet dhe rajonet mesdhetare.
Gërmimet nënujore kanë sjellë në dritë shtylla druri, objekte bakri, qeramikë të gdhendur, si dhe mbetje kafshësh të egra dhe shtëpiake – dëshmi të një komuniteti të organizuar gjuetarësh dhe fermerësh.
“Materiali organik është ruajtur në mënyrë të shkëlqyer nën ujë, çka na lejon të kuptojmë dietën dhe mënyrën e jetesës së atyre njerëzve,” tha arkeologu zviceran Albert Hafner.
Zona e zbuluar deri tani përfaqëson vetëm 1% të një sipërfaqeje prej rreth gjashtë hektarësh, ndërsa gërmimet kanë zgjatur mbi gjashtë vjet. Më shumë se 1 000 mostra druri janë marrë për analizë, të cilat datohen përmes radiokarbonit dhe dendrokronologjisë – metoda që matin unazat vjetore të pemëve.
Arkeologu shqiptar Adrian Anastasi shprehet se zbulimi kërkon dekada për t’u eksploruar tërësisht. “Nga mënyra e ndërtimit të vendbanimit dhe mënyra se si ata ushqeheshin, peshkonin dhe gjuanin, është e qartë se kishim të bënim me njerëz shumë të zhvilluar për kohën e tyre,” theksoi ai.
Liqeni i Ohrit, i ndarë mes Shqipërisë dhe Maqedonisë së Veriut, njihet si liqeni më i vjetër në Europë, me një moshë mbi një milion vjet, dhe tashmë, sipas ekspertëve, edhe me historinë njerëzore më të hershme në këtë kontinent.