Reshjet e vazhdueshme në qarkun e Korçës kanë rënduar situatën në fshatin Kamenicë, ku përroi që përshkon zonën ka dalë nga shtrati, duke rrezikuar drejtpërdrejt banesat përreth.
Banorët raportojnë se skarpatat e betonizuara rishtas janë dëmtuar dhe pjesë të tyre janë shembur, duke bërë që rrjedha e ujit të devijohet drejt shtëpive. Sipas tyre, cilësia e punimeve ka qenë tejet e dobët.
“Lumi ka gërryer skarpatat, nuk ka as një vit që janë betonuar. Plasën pllakat te ura dhe uji po na vjen nëpër shtëpi. Rrezikohen të gjitha banesat. Thonë se është çdo gjë nën kontroll, por siç e shikoni nuk është aspak kështu”, shprehet Ramadan Bezati, banor i zonës.
Ai tregon se rruga është bllokuar dhe janë vendosur shirita sigurie, ndërsa disa biznese tashmë janë përmbytur.
Një tjetër banor, Altin Aliu, thotë se për dy net me radhë të gjithë fshatarët po rrinë jashtë nga frika se uji mund të hyjë në banesa.
“Situata është shumë e rënduar. Uji ka hyrë në lokale dhe nëse shiu vazhdon deri në mëngjes, do futet edhe në shtëpi. Kjo po ndodh sepse punimet nuk janë bërë siç duhet. Lumi nuk është pastruar prej 30 vitesh. Skavatorin e sjellin vetëm për fotografi”, thotë ai.
Ndërkohë autoritetet lokale po monitorojnë situatën, ndërsa banorët kërkojnë ndërhyrje të menjëhershme për të shmangur dëme më të mëdha.