Ndeshjet gjysmëfinale të playoff-it këtë të enjte kanë sjellë ndryshime në klasifikimin e FIFA, duke ndikuar edhe në Kombëtaren shqiptare dhe atë të Kosovës.
Pas disfatës me Poloninë në Varshavë, Shqipëria e drejtuar nga Sylvinho ka humbur një pozicion, duke zbritur në vendin e 64 me 1391.64 pikë, 9.42 pikë më pak se renditja e mëparshme.
Ndërkohë, Kosova, e cila arriti të mund Sllovakinë dhe u kualifikua për finalen e playoff-it, ka fituar një shkallë dhe renditet në vendin e 78 me 1325.43 pikë, duke fituar 16.59 pikë krahasuar me renditjen e mëparshme.
Sa i përket vendeve të para, Spanja vazhdon të mbajë kreun e klasifikimit. Franca, pas fitores 2-1 ndaj Brazilit në miqësoren e së enjtes, ngjitet në vendin e dytë, duke lëvizur Argjentinën, kampione e botës, në vendin e tretë.
Po ashtu, Portugalia ka fituar një pozicion, duke u ngjitur në vendin e 5, ndërsa Brazil zbriti në të 6. Italia, pas fitores ndaj Irlandës së Veriut, ka fituar një pozicion dhe renditet e 12, jashtë dhjetëshes më të mirë që përbëhet nga Holanda, Maroku, Belgjika dhe Gjermania.