Shqipëria do të synojë në muajin nëntor që për herë të parë në histori, të arrijë në Kupën e Botës.
Për të bërë këtë, kuqezinjtë duhet të fitojnë patjetër ndaj Andorrës e më pas të shpresojnë që Anglia të mundë Serbinë për të siguruar vendin e dytë. Aktualisht, kuqezinjtë janë në kuotën e 11 pikëve pas 6 ndeshjeve të zhvilluara, teksa maksimumi i pikëve që mund të arrihen, është 17 pikë.
Por, ky nuk është një rekord pavarësisht se Shqipërisë i siguron zyrtarisht pjesëmarrjen në “Play Off”. Kuqezinjtë kanë bërë edhe më mirë se kaq, megjithatë nuk ka qenë fati ynë për të shkuar më tej, pasi kundërshtarët kanë bërë edhe më mirë se Shqipëria, duke e lënë ëndrrën tonë në gjysmë.
REKORDI I PIKËVE- Shqipëria ka arritur rekordin historik të pikëve në Botërorin e shkuar, aty ku në kualifikuese, kuqezinjtë arritën të grumbullonin plot 18 pikëve, duke marrë 6 fitore. Megjithatë, Shqipëria humbi 4 ndeshjet direkte me kundërshtarët e saj, duke u mundur 2 herë nga Anglia e 2 herë të tjera nga Polonia. Në këtë mënyrë, kuqezinjtë u renditën në vendin e tretë në grupin që ishte i përbërë nga 5 skuadra. Megjithëse Shqipëria ka arritur shifrën më të lartë të pikëve, këtë vit Shqipëria ka një mesatare më të mirë pas 6 sfidave të zhvilluara sepse mesatarja është 1,83 pikë për ndeshje. Nëse arrin të fitojë ndaj Andorrës e të mundet nga Anglia në skenarin më të mundshëm, atëherë Shqipëria do të ishte në mesataren e 1,75 pikëve, që do të thotë një mesatare më e ulët se viti i rekordit.
KRAHASIMI- Në 6 Botëroret e fundit, Shqipëria nuk ka arritur të jetë ndonjëherë pretendente për vendin e dytë dhe këtë e tregon numri i pikëve që ka arritur të marrë në ndeshjet e zhvilluara. Kështu, rekordin më negative, kuqezinjtë e kanë në kualifikueset e Botërorit të 2010 që luhej në Afrikën e Jugut, aty ku mbyllej grupi me vetëm 7 pikë në 10 ndeshjet e zhvilluara. 11 pikë, kuqezinjtë kanë marrë në kualifikueset e Botërorit 2014, ndërkohë që 13 pikë ka grumbulluar në kualifikueset e Botërorit 2006, por asokohe kuqezinjtë zhvillonin plot 12 ndeshje. Kështu, ëndrra e madhe për të arritur në Kupën e Botës, pritet të jetë këtë vit kur kanë mbetur edhe 2 ndeshje për t’u luajtur.
VENDET E DYTA- Në kualifikueset e këtij Botërori, 6 grupe janë me nga pesë skuadra, pjesë e së cilës është edhe Shqipëria. Anglia është ekipi i vetëm Europian i kualifikuar zyrtarisht në Botëror, ndërkohë që lufta për vendin e dytë është ende e hapur. Sa i përket vendeve të dyta në grupet me 5 ekipe, Shqipëria është skuadra që ka grumbulluar më pak pikë se 4 skuadrat e tjera. Rekordin aktualisht e mban Italia me 15 pikë, por që vendin e parë e ruan Norvegjia me 6 fitore në 6 ndeshje. Pavarësisht kësaj, lufta do të jetë e ashpër deri në javën e fundit të ndeshjeve, kur edhe do të ndahen skuadrat e kualifikuara./PanoramaSport