Kryeministri Edi Rama u përball me kritika në emisionin Repolitix në Report TV, ku gazetari Mentor Kikia e akuzoi për një fushatë “folklorike”, të mbushur me kërcime, humor dhe barcaleta, duke u shkëputur nga problemet reale të vendit.
Në një përplasje verbale, Rama reagoi me ironi:
“Ju jetoni me Wagnerin dhe Shekspirin, ndërsa ne kemi Noizyn, muzikën popullore, korçare e shkodrane.”
Kikia i kërkoi kryeministrit të marrë angazhim publik për integrimin në BE, duke e pyetur nëse do të ishte i gatshëm të linte qeverinë nëse Shqipëria nuk mbyll negociatat deri në vitin 2027 dhe nuk bëhet anëtare deri në 2030. Rama refuzoi të japë një zotim të tillë, duke theksuar se afatet varen nga progresi i reformave dhe jo nga deklarata politike.
Kryeministri u shpreh se procesi i integrimit është serioz dhe kërkon përmbushjen e kushteve, ndërsa mbrojti stilin e tij të komunikimit si më pranë shumicës së qytetarëve.