Qeveria vijon lirimin e hapësirave publike nga ndërtimet pa leje në të gjithë vendin. Që nga nisja e nismës në korrik 2025, qytetarët kanë raportuar 11 227 raste abuzimesh në platformën “Hapësira ime publike”, nga të cilat janë zgjidhur 8 052 raste, ndërsa 3 175 janë ende në proces shqyrtimi.
Kryeministri Edi Rama publikoi pamje nga ndërhyrjet në terren për çmontimin e strukturave metalike të vendosura pa leje mbi trotuare dhe rrugë publike, duke theksuar se procesi do të vazhdojë deri në largimin e plotë të tyre. Nisma e qeverisë, pjesë e vizionit “Rilindja Urbane 2.0”, synon të përmirësojë cilësinë e jetës urbane dhe funksionalitetin e bizneseve.
Paralelisht po hartohet Rregullorja Kombëtare që do të përcaktojë me ligj hapësirat e shfrytëzueshme nga bizneset, ku çdo vendim për karrige në hapësira të kufizuara do të shoqërohet me kontribut në Fondin e Gjelbër.