Kryeministri Edi Rama ka komentuar protestat kundër projektit në Zvërnec gjatë podkastit “Flasim”, duke paralajmëruar për rrezikun që qytetarët të ndërtojnë bindjet e tyre mbi informacione të pjesshme dhe narrativa të krijuara nga rrjetet sociale.
Në fjalën e tij, Rama përdori si metaforë personazhin Fabrice del Dongo nga romani The Charterhouse of Parma i Stendhal, për të shpjeguar se si idealet fisnike mund të shndërrohen në iluzione kur nuk mbështeten te faktet.
Sipas kreut të qeverisë, shumë qytetarë që marrin pjesë në protesta e bëjnë këtë me bindje të sinqerta për mbrojtjen e natyrës, por ai vuri në pikëpyetje bazën e informacionit mbi të cilin ndërtohen këto qëndrime.
“Njerëzit mendojnë se po mbrojnë flamingot, Zvërnecin dhe Shqipërinë, por rrezikojnë të bëhen pjesë e interesave të tjera që nuk kanë lidhje me interesat e vendit”, u shpreh Rama.
Ai argumentoi se algoritmet e rrjeteve sociale favorizojnë emocionin, zemërimin dhe frikën, duke krijuar sipas tij një realitet paralel ku perceptimet mbizotërojnë mbi faktet.
Kryeministri theksoi se projekti për Zvërnecin është ende në fazë përgatitore dhe se debati duhet të fokusohet te përmirësimi i tij, jo te kundërshtimi paraprak.
“Ne jemi këtu për të bërë më të mirën për Shqipërinë, për natyrën, për Zvërnecin dhe për flamingot, por duke u bazuar te faktet dhe realiteti, jo te iluzionet”, deklaroi Rama.