Kryeministri Edi Rama ka treguar me humor një episod që lidhet me politikanin britanik, Nigel Farage. Gjatë një deklarate për mediat, Rama tha se Farage kishte kërkuar ta vizitonte në Shqipëri pikërisht më 28 nëntor, Ditën e Pavarësisë, por ai e kishte këshilluar të zgjidhte një datë tjetër.
“Mikun tim të dashur Nigel e kam ftuar, më ka premtuar edhe publikisht që do të vijë. Më kërkoi një datë që përkon me ditën tonë të Pavarësisë dhe i thashë: Nigel, më mirë gjejmë një datë tjetër, sepse po erdhe atë ditë do duhet të përballesh me heroin tonë kombëtar dhe do dukesh shumë i vogël përpara tij,” – tha Rama, mes të qeshurash.
Kreu i qeverisë shtoi se vizita e Farage do të realizohet në një moment tjetër, ndërsa theksoi se marrëdhëniet mes dy vendeve nuk varen nga përkatësitë politike të udhëheqësve.
“Nuk na takon të vendosim se kush zgjidhet ose jo në Britani. E kemi parë shpesh që puna e qeverisë është ndryshe nga poezia kur je në opozitë. Nuk shoh asnjë problem të bashkëpunojmë me këdo. Në fund, besoj se Farage nuk është problemi — ai është thjesht një pasqyrë e problemeve, me një aftësi teatrale për të qenë tërheqës, por problemet janë diku tjetër.”