Në mbledhjen e sotme të Komitetit Parlamentar të Stabilizim-Asociimit Shqipëri–Bashkimi Evropian, të zhvilluar në Strasburg, deputetët e Partisë Socialiste dhe eurodeputetët miratuan rekomandimet në mbështetje të procesit të anëtarësimit të Shqipërisë në Bashkimin Evropian.
Pas votimit reagoi kryeministri Edi Rama, i cili vlerësoi mbështetjen e europarlamentarëve për Shqipërinë dhe kritikoi qëndrimin e përfaqësuesve të opozitës.
“Të gjithë europarlamentarët, edhe ndonjë aty që erdhi e protestoi në Shqipëri, votuan pro Shqipërisë së bashku me parlamentarët e Partisë Socialiste. Sepse Shqipëria nuk ndalet!”, u shpreh Rama.
Kreu i qeverisë pretendoi se deputetët e opozitës votuan kundër rekomandimeve dhe më pas u larguan nga mbledhja.
“Ndërsa parlamentarët e pakicës në Shqipëri votuan kundër dhe ikën për të dalë në fotoprotestë. Sepse Partia Socialiste nuk ndalet”, shkroi ai.
Ndërkohë, Partia Socialiste bëri të ditur se një pjesë e amendamenteve të propozuara nga Partia Demokratike u mbështetën dhe u votuan edhe nga deputetët socialistë, duke e cilësuar këtë një qasje në përputhje me frymën e konsensusit që, sipas saj, duhet të shoqërojë procesin e integrimit të Shqipërisë në Bashkimin Evropian.