Kryeministri Edi Rama u ka bërë thirrje pronarëve të lavazheve që t’i largojnë ato vullnetarisht nga qytetet, duke paralajmëruar se në të kundërt do të ndërhyjë shteti me gjoba dhe prishje.
Në një video të publikuar në rrjetet sociale, Rama tregoi pamje nga aksionet për lirimin e hapësirave publike në Tiranë, ku disa lavazhe të ngritura mes lagjeve janë shembur.
“Askush nuk do të lajë më makina mbi trotuare. Lavazhet nuk kanë vend në mes të lagjeve. Subjektet duhet të marrin leje për njësi normale shërbimi, jo të pushtojnë rrugët,” tha Rama.
Operacioni për lirimin e hapësirave publike është shpallur si një nga prioritetet kryesore të mandatit të katërt të qeverisë, dhe sipas kryeministrit “nuk do të ketë kthim pas”.
Për të forcuar këtë fushatë është hapur portali “hapësiraimepublike.gov.al”, ku qytetarët denoncojnë zënien e paligjshme të trotuareve dhe ambienteve të përbashkëta. Deri tani janë raportuar mbi 10 mijë raste, nga të cilat mbi 6,600 janë zgjidhur, ndërsa 3,400 të tjera janë në proces.
Qeveria po përgatit gjithashtu një rregullore të re për ndërtuesit dhe arkitektët, me masa penale e administrative më të ashpra, ndërsa për çdo kantier ndërtimi do të caktohet një oficer kontakti.