Kryeministri Edi Rama ka reaguar ashpër ndaj abuzimeve me legalizimet në hapësira publike, duke i quajtur ato “çmenduri me qëllim fitimi në kurriz të komunitetit”.
Në një deklaratë të fortë, Rama theksoi se të gjitha ndërtimet si tendat e hekurta në zona publike që kanë marrë dokumente legalizimi në mënyrë të paligjshme, do të anullohen pa asnjë tolerancë. Sipas tij, shumë prej këtyre legalizimeve janë bërë në mes të lagjeve të qyteteve, duke deformuar hapësirat urbane dhe duke dëmtuar interesin publik.
Masë e re ligjore në horizont
Rama njoftoi gjithashtu se si pjesë e reformës së re për kontrollin e territorit, do të miratohet një dispozitë për ndëshkim penal ndaj të gjithë atyre nëpunësve të ALUIZN-it dhe Kadastrës, që kanë firmosur këto legalizime të cilësuara si kriminale.
“Zero tolerancë për këtë abuzim. Përgjegjësit do të mbajnë përgjegjësi jo vetëm administrative, por edhe penale,” – deklaroi Rama, duke i dhënë kështu sinjal të qartë goditjes së praktikave korruptive në institucionet që merren me menaxhimin e pronës publike.
POSTIMI I PLOTË
Për të gjitha këto lloj çmendurish me qëllim fitimi në kurriz të komunitetit, të cilat kanë marrë dokument legalizimi në hapësirën publike duke ngritur tenda hekuri, jo vetëm që do të reagohet me zero tolerancë duke i anulluar ligjërisht, por do të miratohet së shpejti, si pjesë e reformës së re të kontrollit të territorit edhe një masë për ndëshkimin penal të të gjithë atyre nëpunësve të Aluiznit dje apo të Kadastrës më pas, që kanë firmosur për këto legalizime kriminale në mes të lagjeve të qyteteve tona
