Kryeministri Edi Rama, në fjalën e tij gjatë edicionit të 9-të të Future Investment Initiative në Riad, u shpreh se është e gabuar që Europa është përqendruar kryesisht tek armatimi dhe nuk ka një plan të qartë paqeje.
Rama theksoi se për vite me radhë Europa ka vepruar në autopilot duke u orientuar pas SHBA-së, duke harruar dialogun dhe armëpushimin. Ai shprehu shqetësimin për faktin që fjala “bërthamore” është normalizuar në diskursin ndërkombëtar, duke u bërë pjesë e një realiteti të rrezikshëm.
“Një Europë që nuk ka planin e saj të paqes është shqetësuese. Të mendosh vetëm për armatime dhe jo për bisedime për paqen është e rrezikshme,” tha Rama, duke shtuar se pozicioni i Shqipërisë si vend i vogël nuk e bën atë të japë leksione, por shqetësimi mbetet i madh.
Ai përfundoi duke theksuar se Europa duhet të reflektojë dhe të rinisë dialogun mbi paqen, ndërsa vendet e vogla mbeten thjesht vëzhguese të pasojave të vendimeve të mëdha.