SEUL– Kryeministri Edi Rama ka zhvilluar një takim me homologun e tij të Koresë së Jugut, Kim Min-seok.
Bazuar në atë që raportojnë mediat koreano jugore, referuar zyrës së shtypit të kryeministrit Min-seok dy liderët diskutuan mënyrat për të forcuar marrëdhëniet midis dy vendeve.
Kim tha se mezi pret të zgjerojë shkëmbimet dhe bashkëpunimin me Shqipërinë, duke vënë në dukje se kombi ballkanik ka emëruar atë që njihet si “ministri i parë i inteligjencës artificiale (IA)” në botë dhe se Koreja e Jugut gjithashtu i kushton rëndësi IA-s dhe teknologjive të nivelit të lartë.
Ndërsa Kryeministri Rama deklaroi se Koreja e Jugut është një burim frymëzimi për Shqipërinë për sa i përket zhvillimit kombëtar dhe të dy vendet kanë shumë ngjashmëri, pasi kanë kapërcyer vështirësitë dhe kanë arritur zhvillim ekonomik dhe demokraci, edhe pse janë shumë larg gjeografikisht.
Ai tha gjithashtu se Shqipëria është e interesuar në forcimin e bashkëpunimit në fushat e tregtisë, investimeve dhe inteligjencës artificiale.
Takimi u zhvillua ndërsa Rama vizitoi Seulin për të marrë pjesë në një konferencë ndërkombëtare./Radar.al