Kryeministri Edi Rama ka folur me një gjuhë simbolike dhe të ngarkuar emocionalisht për procesin e anëtarësimit të Shqipërisë në Bashkimin Europian, duke e përshkruar atë si një “histori dashurie” që kërkon këmbëngulje dhe përkushtim.
Në një deklaratë të mbajtur së fundmi, Rama u shpreh se Shqipëria ka kënduar serenata për vite me radhë poshtë “dritares së BE-së”, por tani situata ka ndryshuar.
“Tani dritarja është hapur, çarçafi është hedhur, dhe ne – të dashuruarit – duhet të ngjitemi. Por nëse nuk ngjitemi, dritarja mund të mbyllet,” tha Rama, duke theksuar urgjencën dhe rëndësinë e këtij momenti.
Kreu i qeverisë nënvizoi se Shqipëria është e vendosur të përmbushë detyrat dhe se gjithë procesi i integrimit është duke u mbështetur gjithashtu nga teknologjia dhe inteligjenca artificiale, për të rritur efikasitetin dhe për të siguruar transparencë në reformat e nevojshme.
“Unë nuk e kam humbur kurrë besimin. Duhet të jemi gati kur ana tjetër hap dritaren. Dhe tani, ajo është hapur,” – u shpreh Rama, duke apeluar për mobilizim maksimal në këtë fazë vendimtare të rrugës drejt BE-së.