Kryeministri Edi Rama vlerësoi rolin kyç të Agjencisë Kombëtare të Shoqërisë së Informacionit (AKSHI) në përshpejtimin e integrimit europian të Shqipërisë dhe në modernizimin e shërbimeve publike përmes digjitalizimit. Deklaratat u bënë gjatë konferencës së fundvitit me gazetarët.
Sipas Ramës, digjitalizimi i shërbimeve ka sjellë kursime të mëdha për qytetarët. Ai theksoi se, bazuar në studime ndërkombëtare, AKSHI ka kursyer rreth 620 milionë euro, duke shmangur 7 600 vite pritje në radhë dhe miliona procedura fizike. Po ashtu, janë kursyer 74 milionë fletë letre dhe rreth 33 milionë euro për shqiptarët që jetojnë jashtë vendit.
Kryeministri bëri të ditur se 3,4 milionë shqiptarë janë përdorues të rregullt të platformës e-Albania. Vetëm gjatë vitit 2025 janë ofruar rreth 17 milionë shërbime dhe janë gjeneruar 12 milionë dokumente elektronike, me një mesatare prej mbi 1,2 milionë shërbimesh në muaj.
Rama nënvizoi gjithashtu se AKSHI ka ndihmuar drejtpërdrejt procesin e integrimit europian përmes ndërtimit të një sistemi inteligjent për përafrimin e legjislacionit shqiptar me atë të BE-së, proces që sipas tij është realizuar në një kohë shumë më të shkurtër krahasuar me vende të tjera anëtare.
Ai theksoi rolin e teknologjisë dhe inteligjencës artificiale në luftën kundër evazionit dhe në rritjen e transparencës, duke shtuar se skuadra e AKSHI-t ka fituar edhe gara ndërkombëtare brenda NATO-s dhe BE-së në fushën e sigurisë kibernetike.
Sipas Ramës, Shqipëria është renditur nga Banka Botërore në vendin e 14-të nga 197 vende për maturitetin e qeverisjes digjitale, një përmirësim i ndjeshëm krahasuar me vitin 2022. Ai shtoi se edhe OECD dhe BE e konsiderojnë Shqipërinë lider rajonal në Ballkan në këtë drejtim.
Kryeministri paralajmëroi se në shkurt do të lançohet e-Albania 2.0, e cila do të sjellë risi të shumta dhe shërbime edhe më të avancuara për qytetarët.