Qeveria ka miratuar një vendim që parashikon përmirësimin e trajtimit financiar për efektivët e Shërbimit të Mbrojtjes nga Zjarri dhe Shpëtimit, me synim rritjen e mbështetjes për punonjësit që angazhohen në menaxhimin e situatave emergjente.
Ministri i Punëve të Brendshme, Besfort Lamallari, bëri të ditur se vendimi garanton një trajtim më të drejtë dhe më motivues për orët shtesë të punës, shërbimin gjatë natës, punën në ditët e pushimit javor dhe gjatë festave zyrtare.
Sipas tij, akti i miratuar vendos gjithashtu standarde të qarta për mbrojtjen e efektivëve nga mbingarkesa në punë.
“Një lajm i mirë për ata që janë në vijën e parë sa herë që qytetarët kanë nevojë, që përballen me zjarrin, rrezikun dhe çdo situatë emergjente, pa kursyer asgjë nga vetja.
Në mbledhjen e sotme të Qeverisë miratuam vendimin që përmirëson trajtimin financiar të efektivëve të Shërbimit të Mbrojtjes nga Zjarri dhe Shpëtimit, duke garantuar një trajtim më të drejtë dhe motivues për orët shtesë, punën gjatë natës, në ditët e pushimit dhe festat zyrtare, si edhe duke vendosur standarde të qarta për mbrojtjen e tyre nga mbingarkesa në punë”, deklaroi Lamallari.
Ministri e cilësoi vendimin një tjetër hap të rëndësishëm në përmbushjen e angazhimit të qeverisë për të forcuar dhe mbështetur më tej Shërbimin e Mbrojtjes nga Zjarri dhe Shpëtimit.
“Vendimi i sotëm është një hap tjetër domethënës në përmbushjen e angazhimit që ne kemi ndërmarrë për të forcuar e mbështetur më tej djemtë dhe burrat që shërbejnë në këtë shërbim tejet të rëndësishëm. Përkushtimi i tyre nuk njeh orar e as vështirësi, ndaj ne kemi detyrimin e përbashkët t’u gjendemi gjithmonë pranë. Respekt!”, nënvizoi Lamallari.