Qeveria e Shqipërisë ka miratuar ndryshime të reja në procesin e privatizimit të banesave shtetërore, me qëllim lehtësimin e procedurave dhe mbylljen e dosjeve të vjetra që kanë mbetur pezull prej vitesh.
Sipas vendimit, mbi 2 mijë familje në të gjithë vendin pritet të përfitojnë nga ky proces, pasi janë zgjeruar kategoritë përfituese dhe është thjeshtuar dokumentacioni i nevojshëm për aplikim.
Një nga ndryshimet kryesore lidhet me mënyrën e llogaritjes së sipërfaqes “mbi normë”. Deri më tani ajo llogaritej me çmim tregu, ndërsa tani do të llogaritet mbi bazën e kostos aktuale të ndërtimit, duke ulur ndjeshëm koston për qytetarët.
Vendimi parashikon gjithashtu që procedurat të vijojnë edhe në rastet kur mungon dokumentacioni i plotë i pronësisë, duke i dhënë mundësi bashkive dhe Agjencia Shtetërore e Kadastrës të përditësojnë statusin juridik të pasurive dhe të zhbllokojnë dosjet e mbetura pezull.
Në të njëjtën kohë, për banesat që privatizohen nga Enti Kombëtar i Banesave, qytetarët do të paguajnë 4% të vlerës së privatizimit si shpenzim operacional, ndërsa tarifat administrative dhe operacionale duhet të shlyhen përpara nënshkrimit të kontratës.
Qeveria thekson se ky mekanizëm synon të përshpejtojë procesin e privatizimit dhe t’u japë zgjidhje qindra rasteve të mbetura prej vitesh në pritje.