Qeveria ka miratuar Strategjinë Ndërsektoriale të Reformës në Administratën Publike 2025–2027, me një kosto prej 9.27 miliardë lekësh (95.3 milionë euro) për dy vitet e ardhshme. Synimi është përmirësimi i kushteve të punës, digjitalizimi i shërbimeve dhe krijimi i një administrate më efikase e miqësore me mjedisin.
Strategjia parashikon paga më të larta, shpërblime dhe orare më fleksibël për punonjësit e administratës, si dhe mundësinë e reduktimit të orarit të punës për disa institucione e pozicione specifike. Theksi vihet në rekrutimin me meritë, konkurrencë dhe transparencë, si dhe në balancimin e jetës profesionale me atë personale.
Pjesën më të madhe të buxhetit, rreth 7.3 miliardë lekë, e merr digjitalizimi dhe përmirësimi i shërbimeve publike, pasuar nga llogaridhënia dhe mbikëqyrja me 1 miliard lekë. Pjesa tjetër do të përdoret për menaxhimin e burimeve njerëzore, koordinimin e politikave dhe zhvillimin e një administrate “të gjelbër”.
Strategjia thekson nevojën për rritjen e aftësive digjitale të qytetarëve dhe punonjësve, garantimin e sigurisë online dhe mbrojtjen e privatësisë në të gjitha ndërveprimet digjitale.