KALIFORNI – Një burrë nga Kalifornia është akuzuar për tentativë vrasje të Presidentit të Shteteve të Bashkuara të Amerikës, Donald Trump, në një incident që ka nxitur një rishikim të sigurisë në Shtëpinë e Bardhë.
Cole Tomas Allen, 31 vjeç, u përball gjithashtu me dy akuza për armëmbajtje pa leje gjatë paraqitjes së tij në gjykatë në Uashington DC të hënën.
Bazuar në atë që thonë prokurorët ai mbante me vete një pistoletë gjysmë-automatike, një armë gjahu me pompë dhe tre thika, teksa kaloi me forcë një pikë kontrolli sigurie gjatë darkës së Shoqatës së Korrespondentëve të Shtëpisë së Bardhë të shtunën.
Një agjent i Shërbimit Sekret u qëllua, por nuk mbeti i plagosur rëndë gjatë sulmit që ndodhi në një hotel. I akuzuari përballet me burgim të përjetshëm nëse shpallet fajtor.
I veshur me një uniformë blu burgu dhe me një etiketë emri, i dyshuari u shfaq i qetë gjatë seancës gjyqësore të së hënës në kryeqytetin amerikan.
Ai foli me zë të ulët, duke iu përgjigjur pothuajse çdo pyetjeje të gjyqtarit me “po, i nderuar gjykatës” ose “jo, i nderuar gjykatës”.
Ndër të tjera deklaroi moshën e tij dhe tha se kishte një diplomë master. Tre marshallë amerikanë qëndronin pas tij dhe një tjetër pranë tij, ndërsa prokurorja federale që po merret me çështjen, Jeanine Pirro, e ndiqte nga afër.
Gjatë incidentit të së shtunës në mbrëmje, Trump, Zëvendëspresidenti JD Vance, anëtarë të kabinetit dhe zyrtarë të tjerë të Shtëpisë së Bardhë u larguan me shpejtësi nga salla e hotelit Ëashington Hilton, pasi u dëgjuan të shtëna armësh.
I dyshuari dyshohet se kaloi me forcë një pikë kontrolli sigurie një kat mbi sallën ku po zhvillohej aktiviteti.
“Një oficer i Shërbimit Sekret u qëllua në gjoks, por mbante një jelek antiplumb që funksionoi,” deklaroi ushtruesi i detyrës së Prokurorit të Përgjithshëm, Todd Blanche, gjatë një konference për shtyp të hënën./Radar.al