Kryeministri në detyrë i Kosovës, Albin Kurti, ka reaguar ashpër ndaj një gazetareje që ngriti pyetje për mungesën e barnave në sistemin shëndetësor, duke shmangur përgjigjen dhe duke e drejtuar vëmendjen tek një çështje tjetër financiare.
Ndërsa gazetarja i drejtohej ministrit në detyrë të Shëndetësisë, Arben Vitia, për mungesën e albuminave, Kurti ndërhyri duke thënë:
“Zonja gazetare, ju i thoni pronarit të televizionit tuaj që t’ia kthejë 62.6 milionë euro Telekomit të Kosovës, pastaj flisni për albuminat.”
Ai e përsëriti këtë deklaratë edhe gjatë largimit nga vendi ku po jepeshin deklaratat për media, duke iu rikthyer gazetares dhe duke i thënë:
“62.6 milionë euro, mos harroni.”
Deklarata ka nxitur reagime të shumta në rrjetet sociale, ku kritikohet gjuha e përdorur nga kreu i qeverisë dhe përpjekja për të personalizuar një pyetje publike, në vend që të ofronte përgjigje për një çështje me ndjeshmëri të lartë për qytetarët.