Presidenti rus, Vladimir Putin, ka urdhëruar zyrtarët e lartë të hartojnë propozime për testime të mundshme të armëve bërthamore, menjëherë pas deklaratës së Presidentit amerikan Donald Trump, i cili javën e kaluar njoftoi rifillimin e testeve bërthamore nga SHBA.
Putin theksoi se Rusia gjithmonë i ka përmbajtur detyrimeve të saj sipas Traktatit Gjithëpërfshirës për Ndalimin e Testimeve Bërthamore, por shtoi se në rast të veprimeve të SHBA ose ndonjë fuqie tjetër bërthamore, Moska do të marrë masa reciproke.
“Rusia nuk ka plane të tërhiqet nga traktati, por nëse Shtetet e Bashkuara ose nënshkrues të tjerë kryejnë teste, Rusia do të detyrohet të marrë masa të përshtatshme. Kam udhëzuar Ministrinë e Jashtme, Ministrinë e Mbrojtjes, shërbimet speciale dhe agjencitë civile përkatëse të mbledhin informacion shtesë, ta analizojnë dhe të bëjnë propozime mbi përgatitjet për testime të armëve bërthamore,” tha Putin.
Nga ana e tij, Ministri i Mbrojtjes rus, Andrei Belousov, e vlerësoi situatën si të tensionuar dhe sugjeroi përgatitje të menjëhershme për teste bërthamore në shkallë të plotë. Ai theksoi se vendi i testimeve në Novaya Zemlya, Arktik, mund të pranojë teste me njoftim të shkurtër.
Ky zhvillim shënon një eskalim të tensioneve strategjike midis Rusisë dhe SHBA, duke hapur një kapitull të ri në garën për fuqinë bërthamore dhe balancën e sigurisë globale.