Presidenti rus, Vladimir Putin, deklaroi se Rusia nuk ka ndërmend të sulmojë Evropën dhe se është e gatshme ta dokumentojë këtë në formë të shkruar, si pjesë e negociatave diplomatike. Ai e quajti si “absurditet të plotë” pretendimin se Rusia synon të pushtojë vende të tjera evropiane.
“Për ne, kjo tingëllon qesharake. Kurrë nuk kemi pasur ndërmend ta bëjmë këtë. Por nëse duan një garanci nga ne, mund ta japim edhe me shkrim”, tha Putin gjatë një konference për shtyp pas vizitës së tij në Bishkek, kryeqytetin e Kirgistanit.
Siguria e dhënë nga Kremlini vazhdon të mos pranohet plotësisht nga Perëndimi, veçanërisht pas pushtimit të Ukrainës, i cili ka nisur mbi tre vjet e gjysmë më parë.
Në të njëjtën kohë, Putin ripërsëriti gatishmërinë për negociata paqeje. Javën e ardhshme pritet që përfaqësuesit e SHBA-së të mbërrijnë në Moskë për bisedime, ku do të diskutohet përfundimi i mundshëm i konfliktit dhe garancitë e sigurisë për Ukrainën dhe Evropën.
Si parakusht për një marrëveshje, Putin theksoi se trupat ukrainase duhet të tërhiqen nga provincat Donetsk dhe Luhansk në rajonin lindor të Donbasit. “Në të kundërt, Rusia do të vazhdojë luftën për të arritur qëllimet e saj për kontroll të plotë mbi Ukrainën”, paralajmëroi ai.