Një formulë e re, “Paradite në punë, pasdite në plazh”, po përdoret për të joshur të rinjtë drejt sektorit të turizmit, në një përpjekje për të zbutur mungesën e fuqisë punëtore që po prek gjithnjë e më shumë këtë industri.
Sipas Gertiola Çepanit nga Agjencia Kombëtare e Punësimit dhe Aftësive (AKPA), bizneset në sektorin e turizmit kanë filluar të ofrojnë kushte më të mira pune, përfshirë edhe akomodim për punonjësit. Ndërkohë, paga më të larta dhe ndarje më e qartë e orareve po i bëjnë ofertat më tërheqëse.
Në pesë muajt e parë të vitit janë shpallur mbi 6 mijë vende pune në turizëm, me aktualisht rreth 2 mijë pozicione ende të hapura — kryesisht për profesione si kamarierë, banakierë e kuzhinierë.
Megjithatë, përkundër interesit të shtuar, numri i aplikantëve vendas nuk mjafton. Rreth 10% e të interesuarve janë shtetas të huaj, çka tregon një tendencë të rritjes së mbështetjes tek emigrantët sezonalë.
Për ta forcuar më tej këtë përpjekje, qeveria pritet të nisë një tjetër iniciativë: “Trajnim gjatë punës, kundrejt pagesës”, një skemë e bashkëfinancuar nga shteti dhe bizneset për të përgatitur më shumë të rinj për tregun e punës në kohë rekord.