Kryeministri Edi Rama do t’i rikthehet nesër rubrikës së tij të njohur “Sy m’sy”, për një bashkëbisedim live me qytetarët në rrjetet sociale.
Takimi virtual do të zhvillohet të dielën, më 21 korrik, në orën 08:30 të mëngjesit, dhe do të fokusohet te çështja e lirimit të hapësirave publike, një temë që ka nxitur diskutime të forta kohët e fundit.
Në një postim të bërë sot, Rama iu përgjigj atyre që pyesin për momentin e këtij komunikimi:
“Ca thonë pse tani e jo më parë? Ca pse tani e jo më vonë? Kurse unë them pse jo nesër një SY M’SY? NESËR pra, që në mëngjes, LIVE padyshim, KËTU ku tjetër.”
Rubrika “Sy m’sy” ka qenë më herët një kanal i drejtpërdrejtë komunikimi mes kryeministrit dhe ndjekësve të tij në rrjetet sociale, ku trajtohen shqetësime të përditshme dhe temat më të nxehta të aktualitetit.